OMMIADAE

OMMIADAE

nomen familiae, quae Regnum Fezzanum condidit, eique praefuit, donec a Zenetis pulsi sunt. Cum enim familia Omniae per Abbazidas Caliphatu Syriae deiecta fuisset, circa A. C. 800. pars in Africam, pars in Hispaniam se receperunt, ibique novos condiderunt Caliphatus. E quibus oriundus Idris ad montem Atlantem in Mauritania, urbem Fezzam condidit; et in ea Regni sedem fixit, adsumptô Galiphae titulô. Paulo post Saraceni hi Afri, circa A. nempe C. 820. omnes pene Insulas maris Mediterranei suâ piraticâ infestantes, eas partim graviter adflixerunt, partim penitus occupârunt, Cretam praecipue Siciliamque: in quarum illa urbem struxêre Candiam a qua toti Insulae nomen impositum est; ista in eorum potestatem pervenit A. C. 828. in eaque mansit annis ducentis quinquaginta. Donec videl. Zeneti, Africae populi, duce Mec-nazâ et Magraoâ, familiam Idris penitus extirpârunt, circa A. C. 950. quô ad aliam familiam Regnum sic translatum est. Zenetos postea Lautunii, Africae itidem gens, Almoravidae cognominati, exturbârunt, A. C. 1052. quos Almohadae extinxerunt, A. C. 1139. a Merinis expulsi, A. C. 1210. donec istis Oattasseni, A. C. 1420. hisque Scerisii successerunt, A. C. 1548. quorum stirps hodieque regnat. Georg. Hornius Orbis Imper. p. 322. et seqq.